Den conexion cu e cifra di desempleo hubenil: Aruba ta ofrece varios opcion di enseñansa, pa engrandece oportunidad laboral pa nos hobennan
ORANJESTAD - Durante conferencia di prensa di Gobierno, Minister di Labor Glenbert Croes a elabora riba a e cifra di desempleo hubenil. Un estudio y sondeo cu a wordo ehecuta pa Departamento di Labor y Investigacion (DAO), CBS – Centraal Bureau Statistiek y Banco Central di Aruba.
Minister Croes a indica cu si compara e porcentahe di desempleo hubenil actual cu locual e tabata na 2020, por bisa cu e rebaho ta uno remarcabel y substancial. Na 2020, debi na e pandemia, e cifra di desempleo hubenil a subi drasticamente, na un porcentahe maximo di 25.9%. Actualmente, esaki a baha te na 9.9%, cu apesar di ta un bahada drastico, ainda ta representa un total di 411 hoben sin trabou.
Minister Croes a expresa di ta orguyoso di e hobennan cu a probecha e oportunidad di tuma nan futuro den nan man y busca un empleo, pero ta preocupa ainda pa e cantidad cu ainda no tin trabou y cu no ta bayendo scol tampoco. E categoria di hobennan aki, di 15 pa 24 aña di edad, ta hustamente esunnnan cu mester wordo guia bek den rumbo di enseñansa, (re)capacitacion, pa por eventualmente haya un trabou den e sector turistico, cu ta e pilar economico mas grandi di Aruba y cu ta brinda hopi oportunidad di trabou.
"Mi kier extende un invitacion na tur e hobennan cu ta den necesidad di un trabou, pa pasa Eseñansa pa Empleo pa asina tuma parti den loke ta e cursonan cu tin disponibel. Tin cursonan di waiter y bartending, cu lo yuda cada un di boso pa drenta mas facilmente e mercado laboral. Aruba tin hopi oportunidad, ta keda na cada hoben pa tuma ventaha di esaki y sigura un miho futuro" Minister Croes a expresa.
Si bo ta buscando trabou y no por haya, e mandatario ta invita bo pa pasa registra na DPL kendenan lo intermedia cu sector priva pa un oportunidad pa trabou.
“Nos ta riba e bon caminda pero nos esfuersonan mester continua pa pone tur nos yiunan di Tera na trabao y forha pa nan un futuro briyante cu henter Aruba tin derecho riba dje”, e mandatario a clausura.
