E vision pa transforma e zona di refineria den e "Aruba Hydrogen Valley" pronto lo bira realidad

"Loke kisas otro hende no a pensa posibel, nos ta bay haci realidad"

ORANJESTAD - Den cuadro di bishita di Minister di Energia Glenbert Croes y su delegacion na Spaña, a bishita e planta di hydrogeno na Mallorca "Power to Green Hydrogen Mallorca". ACCIONA den aliansa cu EnaGas y varios otro companianan ta produci na e planta aki e hydrogeno pa despues transporta esaki.

Minister Croes a indica cu e planta di Mallora ta manera un refineria di hidrogeno pero den un tamaño mas chikito, pero cu pa Aruba, mirando e necesidad y consumo di Aruba, e planta lo ta un averahe di 5 biaha mas grandi. Pa Aruba como lider di e proyecto aki den e region caribense, lo ta importante pa e suministro di hidrogeno no solamente tin su impacto riba e economia y comunidad di pais Aruba sino tambe riba e region.

E proyecto di hidrogeno na Mallorca, ta e prome proyecto di hydrogeno na Zuid -Europa y p’esey Minister Croes y delegacion a bay bishita e planta pa asina por mira y reuni cu e companianan manera Acciona Energia, otro stakeholdersnan, gobierno y institutonan cu ta trahando riba e proyecto aki, pa nan yuda, guia y asisti Aruba den haci e "Aruba hydrogen Valley" un realidad.

Segun e mandatario, e zona di refineria di Aruba lo wordo transforma den un "hydrogen valley" na unda tambe lo tin otro proyectonan di energia renobabel y sostenibel cu ta fundamental den sigura e miho interes di e comunidad y medio ambiente, hisando e calidad di bida cu cada un persona merece.

Minister Croes a expresa tambe cu pa su persona tabata un orguyo di wak e presencia di sernan femenino liderando e proyecto aki na Mallorca, specialmente paso Aruba ta conta cu varios ser femenino den gobierno y parlamento. Minister Croes a sigura di percura cu Aruba su lidernan femenino manera Prome Minister y Minister di Finansas hunto cu e representantenan femenino den Parlamento lo ta parti di ful e proceso di e transformacion y desaroyo di e proyecto energetico, "Aruba hydrogen Valley".

"Ta nos contribucion cu mundo y Aruba pa ta lider den region pa bin cu un proyecto asina. Loke kisas otro hende no a pensa posibel, nos ta bay haci un realidad." Minister Croes a expresa.

Previous
Previous

"Aruba su Green Hydrogen Valley"E vision energetico di Minister Glenbert Croes y gobierno di Aruba lo ta e proximo pilar economico di Aruba

Next
Next

E retonan cu Aruba ta enfrentando riba tereno di energia ta crucial pa nos por asumi e desafio y realisa e proyectonan necesario