ELMAR a inverti un suma di 10 miyon florin pa sigura cu suministro di coriente ta continuo y confiabel

ORANJESTAD - Diabierna atardi, Minister di Energia Glenbert Croes tabata presente na e inauguracion di e onderstation nobo di ELMAR na Sabana Blanco. E mandatario a expresa di ta sumamente contento cu e proyecto aki a keda inaugura y cu e inversion grandi aki lo sigura cu e suminsitro di coriente lo tuma luga di un forma continuo y confiabel pa henter comunidad.

“Awe ta un dia grandi pa ELMAR. Awe ta un dia grandi pa Aruba cu inauguracion di e substation nobo na Sabana Blanco.” E inversion grandi aki, ta muestra di e compromiso cu ELMAR tin, como compania di pueblo, pa traha na bienestar di nos comunidad. Minister Croes a splica si, cu ainda no a yega e punto na unda por duna e siguransa cu coriente no ta bay, pero ta trahando duro pa minimalisa e molester cu e baymento di coriente ta causa, ora cu p.e. tin un problema den e sistema of durante un accidente of kabelnan di 50 aña bieu cu mester wordo renoba. Como Minister di Energia, Glenbert Croes a reuni cu ELMAR y cu Utilities pa pidi nan pa acelera tur e inversionnan. E mandatario a sigura ambos compania estatal, cu nan tin e sosten y apoyo di Gobierno.

"E substation aki, tin un inversion di 10 miyon florin y lo contribui enormemente den a plan di ELMAR pa mehora e confiabilidad, e calidad y e continuidad den suministro di coriente.

Mi ta hopi orguyoso di e hunta di directiva, di e director, di tur empleado y di e contratistanan di ELMAR pa e gran trabou cu nan a bin ta desplegando, pa asina por duna un miho servicio di suministro di coriente na comunidad.

Un pabien na tur esnan cu ta labora na ELMAR cu e proyecto aki y danki pa boso esfuerso y dedicacion na mehoracion di e servicio di coriente na nos clientenan" Minister Croes a expresa.