Minister Glenbert Croes: Gobierno ta keda determina pa baha awa y coriente
ORANJESTAD - Durante un conferencia di prensa di Gobierno, Minister di Energia Glenbert Croes, a wordo cuestiona riba loke ta e ganashi pa 2024, di 15 miyon florin, presupuesta pa Utilities Aruba NV. Minister Croes a clarifica cu na momento cu e companianan estatal, WEB, ELMAR Y Utilities traha nan presupuesto, nan ta traha esaki a base di nan inversionnan, costo di operacion, maneho di Gobierno pa reduci awa y coriente, y pa e parti cu ta toca Gobierno como accionista final. E suma aki, tambe ta pa cubri tur compromiso financiero cu Gobierno tin. E no ta un secreto cu e nivel di debe di Aruba ta hopi halto, y esaki no ta solamente debi na e pandemia, sino tambe na e debe grandi cu Gabinete Mike Eman a laga atras pa nos pueblo, cu ta compromisonan financiero cu Aruba y Gabinete Wever Croes a hereda y mester cumpli cu ne.
Minister Croes tambe a indica, cu Gobierno ta haciendo nan maximo esfuerso, por medio di diferente proyectonan energetico, pa asina yuda baha e gastonan pa e companianan estatal. E proyecto di Eagle LNG, programa di hedging, e negociacionnan cu por ehempel Petroecuador, e tender cu actualmente ta tumando lugar ta pa yuda baha e gastonan envolvi na momento di cumpra heavy fuel oil, generando mas entrada pa WEB, cu e resultado di por baha e prijs di awa y coriente.
"Finalmente, e ta Gobierno su compromiso pa haci tur locual ta na su alcanse pa baha costo di bida y esey nos ta bin ta haciendo. E no ta un proceso facil, pero nos ta keda comprometi cu nos pueblo. Mirando tur e esfuersonan cu Gobierno ta bin ta haciendo, pronto nos lo logra. Mi kier a pidi pueblo di Aruba y specialmente esnan cu ta apreciativo di e trabounan duro cu Gobierno ta bin ta haciendo, pa no laga e comentarionan negativo y destructivo, afecta boso pensamentonan. Cambia tur e negativismo den positivismo, mustrando tur esnan skeptico, cu na final di dia, tur e esfuersonan di e Gobierno actual, lo trece resultado positivo pa cada ciudadano di pais Aruba. Nos compromiso ta y lo keda semper e progreso y bienestar di nos pueblo." Minister Croes a expresa.
