WEB ARUBA NV TA FIRMA UN ACUERDO CU ACCELERON: Cu e inversion den e "turbo charger" nan aki, WEB ta pone un fundeshi grandi, pa ora tin disturbio den su facilidadnan
ORANJESTAD - Diahuebs mainta, Minister di Energia Glenbert Croes a asisti na e ceremonia y conferencia di prensa pa loke ta e firmamento di un acuerdo entre WEB y Acceleron. Minister Croes a indica, cu como Minister di Energia, e ta sumamente orguyoso di e acuerdo firma, mirando cu e ekiponan y facilidadnan nobo aki, lo yuda pa e produccion di awa y coriente ta mas confiabel y estable.
E acuerdo aki, ta un muestra di e compromiso cu WEB Aruba NV tin cu nos pueblo, na unda conhuntamente cu e compania Acceleron, ta pone un piedra grandi den e fundeshi, pa brinda comunidad di Aruba, e confiabilidad y siguridad, cu e ekipo y facilidadnan nobo aki ta sigura cu e produccion di awa y coriente ta tuma luga debidamente.
Minister Croes ta felicita e liderasgo di e director y e personal completo di WEB Aruba NV, pa nan esfuerso, nan trabou incansabel y nan dedicacion na brinda e pueblo di Aruba un servicio di awa y coriente sigur. WEB Aruba NV ta un di e companianan strategico den e desaroyo y progreso di pais Aruba y lo por conta cu e sosten di Gobierno, den tur inversion cu nan ta haciendo, pa brinda e pueblo di Aruba un bon produccion y calidad di awa como tambe produccion di coriente continuo y estable.
"Masha pabien na e staff y personal di Web Aruba NV. Nos ta contento cu boso trabou y ta orguyoso pa wak un compania grandi manera Acceleron deposita su confiansa den Aruba y den e relacion cu WEB Aruba NV" Minister Croes a expresa.
E mandatario a continua expresando cu e ta orguyoso di tur e profesionalnan na WEB Aruba N.V. cu e tremendo logro di e acuerdo logra cu ACCELERON. Esaki lo haci cu e trabou di reparacion di nos ekiponan lo wordo haci na Aruba mes hunto cu e expertonan di WEB. Esaki lo aporta grandemente den reparacion cu rapides y confiabilidad sigurando continuidad den e produccion di awa y electricidad pa henter Aruba.
